4 (17) сентября - икона Божией Матери «НЕОПАЛИМАЯ КУПИНА» - избавляет дома почитающих и молящихся Ей от пожаров.
Тропарь, глас 4:
Иже во огни купины неопапимыя, древле Моисеем виденныя,/ тайну воплощения Своего от Неискусобрачныя Девы Марии Прообразовавый,/ Той и ныне яко чудес Творец и всея Твари Создатель/ икону Ея святую чудесы многими прослави,/ даровав ю верным во исцеление недугом и в защищение от огненнаго запаления./ Сего ради вопием Преблагословенней:/ Надеждо христиан, от лютых бед, огня и грома избави на Тя уповающия, и спаси души наша яко Милосерда.
Молитва пред иконой Божией Матери Неопалимая Купина
О Пресвятая и Преблагословенная Мати сладчайшего Господа нашего Иисуса Христа! Припадаем и поклоняемся Тебе пред Святою и Пречестною иконою Твоею, еюже дивная и преславная чудеса содеваеши, от огненнаго запаления и молниеноснаго грома жилища наша спасаеши, недужныя исцелявши, и всяко благое прошение наше во благо исполнявши. Смиренно молим Тя, Всесильная рода нашего Заступнице, сподоби ны немощныя и грешныя, Твоего матерняго участия и благопечения. Спаси и сохрани, Владычице, под кровом милости Твоея Церковь Святую, обитель сию, всю страну православную, и вся ны припадающия к Тебе, с верою и любовию, и умиленно просящия со слезами Твоего заступления. Ей, Госпоже Всемилостивая, умилосердися на нас, обуреваемых грехми многими и не имущих дерзновения ко Христу Господу просити Его о по¬миловании и прощении: но Тебе предлагаем к Нему на умоление, Матерь Его по плоти: Ты же, Всеблагая, простри к Нему Богоприимнеи руце Твои, и предстательствуй за нас пред благостию Его, просящи нам прощения прегрешений наших, благочестнаго мирнаго жития, благия христианския кончины и добраго ответа на Страшнем Суде Его. В час же грознаго посещения Божия, егда огнем возгорятся домы наши, или молниеносным громом устрашаеми будем, яви нам милостивное Твое заступление и державное вспоможение: да, спасаеми всесильными Твоими ко Господу молитвами, временнаго наказания Божия зде избегнем и вечное блаженство райское тамо унаследуем, и со всеми святыми воспоем пречестное и великолепое имя поклоняемыя Троицы, Отца и Сына и Святаго Духа, и Твое велие к нам милосердие, во веки веков. Аминь.
