К вам, святии безсребреницы и чудотворцы Космо и Дамиане, яко к скорым помощником и теплым молитвенником о спасении нашем, мы, недостойнии, преклоните колена, прибегаем и припадающе усердно вопием: не презрите моления нас, грешных, немощных, во многая беззакония впавших, и по вся дни и часы согрешающих. Умолите Господа, да пробавит нам недостойным рабом Своим, вёликия и богатыя Своя милости; избавьте нас от всякия скорби и болезни, вы бо прията есте от Бога и Спаса нашего Иисуса Христа неоскудную благодать исцелений, ради твердыя веры, безмезднаго врачевания и мученическия кончины вашея. Ей, угодницы Божий, не престайте моляшеся за ны, с верою к вам притекающыя: аще бо по множеству грехов нашых и несмы достойни милосердия вашего, обаче вы вернии подражателие человеколюбия Божия суще, сотворите, да принесем плоды достойны покаяния, и в вечный покой достигнем хваляще и благословяще дивнаго во святых Своих Господа и Бога и Спаса нашего Иисуса Христа, и Пречистую Матерь Его, и ваше теплое заступление, всегда, ныне и присно и во веки веков. Аминь