Молитва преподобному Нилу, Сорскому чудотворцу
"О, преподобие и богоблаженне отче Ниле, богомудрый наставниче и учителю наш! Ты любве ради Божия от мирских смущений удаляяся, в непреходней пустыни и в дебрях вселитися изволил еси, и яко лоза благоплодна, чада пустыни умножив, словом, писанием и житием образ всякия иноческия добродетели явился еси; и яко ангел во плоти пожив на земли, ныне, в селениих небесных, идеже празнующих глас непрестанный, водворяешися, и с лики святых Богу предстоя, тому хвалы и славословия непрестанно приносили.
Молим тя, Богоблаженне, настави и нас, под кровом твоим жительствующих, непреткновенно по стопам твоим ходити и Господа Бога всем сердцем своим любити, того Единаго вожделети и о том Едином помышляти, мужественно же и благоискусно противу долу влекущих помыслов и прилогов вражиих пратися и тыя всегда побеждати; всякую же тесноту монашеского жития возлюбити и красная мира сего, любве ради Христовы, возненавидети помози нам; всякую же добродетель, в нейж сам потрудился еси, в сердцах наших насадити нам пособствуй. Моли Христа Бога, дай всем православным христианом, в мире живущым, просветит ум и очи сердечныя, еже ко спасению, утвердит я в вере и благочестии и в делании заповедей Своих сохранит же от лести мира сего, и оставление грехов даруетвсем христианом, таже и вся потребная во временному житию всем приложит.
Да всю державу нашу в любви, единомыслии и в долгоденствии да соблюдет, и всякое начало и властии все воинство на путь правды и верности да управит: да тако вси христиане, в пустыни и в мире жительствующий, тихое и безмолвное житие поживут во всяком благочести и честности, и Христа усты и сердцем прославят, купно со Безначальным Его Отцем и Пресвятым и Благим Животворящим Его Духом, всегда, ныне и присно во веки веков. Аминь".
Молитва преподобному Макарию Александрийскому
"О священная главо, земный ангеле и небесный человече, преподобие и богоносне отче наш Макарие! Припадаем та с верою и любовию и молимся прилежно: яви нам, смиренным и грешным, святое твое заступление. Се бо, грех ради наших, не имамы свободы чад Божиих просити о потребах наших Господа и Владыку нашего, но тебе молитвенника благоприятнаго к Нему предлагаем и просим тя со усердием многим: испроси нам у благости Его благотребныя дары душам и телесем нашим: веру праву, надежду спасения несомненну, любовь ко всем нелицемерну, в злостраданиих терпение, в молитвах постоянство, душ и телес здравие, земли плрдоносие, воздуха благорастворение, житейских потреб довольство, мирное и безмятежное житие, благую христианскую кончину и добрый ответ на Страшнем Суде Христове. Не забуди, преподобие отче, и пустынное место подвигов твоих, но благоволи о нем и прослави е чудотворении твоими: и всех, приходящих на поклонение мощем твоим святым, от искушений диавольских и всякого зла милостивно избави. Ей, чудотворне святый! Не лиши нас помощи твоея небесныя, но молитвами твоими вся ны приведи во пристанище спасения, и наследники яви нас Всесветлаго Царствия Христова, да поем и славим неизреченныя щедроты Человеколюбца Бога, Отца и Сына и Святаго Духа, и твое святое отеческое заступление, во веки веков. Аминь".
